Madaxweynaha cusub ee Wadanka Gambia, Adama Barrow, ayaa gelinkii dambe ee Khamiistii gaaray Magaalada Banjul ee Xarunta Gambia.
Diyaarad uu Madaxweynaha Gambia ka soo raacay Magaalada Dakar ee Wadanka Senegal, ayaa si nabdoon kaga dejisay Garoonka Banjul, iyadoona uu socod ku soo maray faras magaalaha Banjul.
Kumanaan ka mid ah taageere-yaashiisa, ayaa isugu soo baxay wadooyinka Magaalada Banjul. Dadkan ayaa qaarkood watay boorar ay ku qoran yihiin hal ku dhigyo lagu soo dhaweynayo Madaxweynaha la doortay.
Tallaabada uu Madaxweynuhu ku yimid Caasimadda Banjul, ayaa waxay ka dambeysay, ka dib markii Madaxweynihii doorashada looga adkaaday, Yahya Jammeh uu aqbalay natiijada doorashada.
Madaxweynaha la doortay ee Gambia, ayaa 20-kii bishan lagu dhaariyay Safaaradda Gambia ku leedahay Magaalada Dakar, sababo ku aadan xilligaa oo kursiga uu isu dhejinaayay Yahya Jammeh.
Wadamada Afrikada Galbeed (ECOWAS), ayaa Mr Jammeh cadaadis xoogani ku saaray in uu isaga taggo Magaalada Banjul, haddii kalana ay tallaabo militari ka qaadi doonaan.
Dadka reer Gambia, ayaa bartamihii toddobaadkan bilaabay in ay dib ugu soo laabtan Banjul, ka dib markii uu dalka isaga tagey Jammeh.
