Magaalada Dhuusamareeb ee caasimadda dowlad-goboleedka Galmudug ayaa maanta lagu qabanayaa doorashada hoggaamiyaha maamulka iyo ku-xigeenkiisa, iyadoo si weyn loo adkeeyay amniga guud ee magaalada iyo goobta ay doorashadu ka dhacayso.
Golaha Wakiillada Galmudug oo ka kooban 89 xubnood ayaa maanta dooranaya hoggaamiyaha cusub ee maamulka, kaas oo beddeli doona madaxweynaha hadda xilka haya, Axmed Cabdi Kaariye (Qoorqoor).
Doorashada hoggaamiyaha Galmudug waxaa ku tartamaya Cabdulqaadir Cabdullaahi Diiriye oo ka socda Xisbiga Sincad iyo Liibaan Axmed Xasan oo matalaya Xisbiga Caddaaladda iyo Wadajirka (JSP).
Labada musharrax ayaa wajahaya tartan ay natiijadiisu ku xirnaan doonto codadka ay ka helaan xubnaha Golaha Wakiillada, kuwaas oo awood u leh inay doortaan hoggaamiyaha cusub ee maamulka.
Sidoo kale, waxaa maanta la qabanayaa doorashada hoggaamiye ku-xigeenka Galmudug, iyadoo labada doorasho ay qayb ka yihiin hannaanka lagu dhisayo hoggaanka cusub ee maamulka.
Ammaanka magaalada Dhuusamareeb ayaa si weyn loo adkeeyay, waxaana ciidamo badan oo ka tirsan dowladda Federaalka Soomaaliya la dhigay waddooyinka soo gala goobta doorashada. Waxaa sidoo kale la xiray waddooyin muhiim ah si loo sugo amniga, loogana hortago wax kasta oo carqaladeyn kara doorashada.
Wararka laga helayo magaalada ayaa sheegaya in xaaladda amni ay deggan tahay, iyadoo ciidamada ammaanku ay ku jiraan heegan si doorashadu ugu dhacdo jawi nabdoon.
Doorashadan ayaa soo afjari doonta marxaladda hoggaamineed ee Axmed Cabdi Kaariye (Qoorqoor), iyadoo la sugayo qofka ku guuleysta hoggaanka Galmudug iyo ku-xigeenkiisa.
Natiijada doorashada ayaa sidoo kale saameyn ku yeelan karta jihada siyaasadeed ee Galmudug iyo xiriirka maamulka uu la yeelan doono dowladda Federaalka Soomaaliya iyo dhinacyada siyaasadeed ee dalka.
Waxaa la sugayaa natiijada rasmiga ah ee codbixinta iyo magaca hoggaamiyaha cusub ee Galmudug, kaas oo hoggaamin doona maamulka muddada soo socota.




