Muqdisho-RisaalaFM- Wajiga labaad Barnaamijka Afuri oo hel laba Ajir ee Idaacadda Risaala ayaa maanta waxaa lagu Afuriyay Qoysas gaaraya 70 Qoys, oo aad u liitay, kuwaasi oo u baahnaa gar gaar bani’aadanimo.
Dhaqaalaha ayaa waxaa laga soo aruuriyay dhageystayaasha Idaacadda Risaala, kuwaasi oo wixii ay aboodaan ku yaboohay Barnaamijka Afuri oo hel laba AJir.
Waa wajigii labaad oo Deeqdan laga qeybiyo Degmada kaxda halkaasi oo ay ku nool yihiin Qoysaska ku soo barakacay Gobolka Banaadir, kana soo cararay Abaaraha ka jira gobolada dalka.
Agaasimaha Idaacadda Risaala Maxamed C/wahaab C/laahi oo ka hadlay madashii Deeqdaasi lagu qeybinayay ayaa sheegay Dhaqaalahan in laga soo aruuriyay Dhageystayaasha Risaala oo kaalin muuqata ka qaatay gar gaarkan bani’aadanimo ee loo fidiyay dadkan aan heysan wax ay ku afuraan.
Mudane Maxamed C/wahaab C/aalhi Agaasimaha Idaacadda Risaala ayaa sharaxaya dhaqaalaha Risaala ay aruurisay iyo Qoysaska qaabka loogu qeybiyay.
Sheekh Maxamed oo ka mid ah culimada ku nool Degmada Kaxda kuna sugnaa goobta ayaa sheegay dadkii soo aruuriyay Deeqdan in Ajir badan ay ka helayaan, maadaama walaalahooda dhibaateysan ay u gar gaarayaan.
Dadkii Deeqdan la gaarsiiyay ayaa u mahadceliyay dhageystayaasha Idaacadda Risaala, waxaana ay sheegeen Deeqdan maanta la soo gaarsiiyay in ay aheyd mid ay u baahnaayeen, maadaama ay ku jiraan dad sooman oo aan meelna ku ogeyn Afurka, saxuur iskaba daayee.
Ugu dambeyn waxaa goobta ka hadlay Guddoomiyaha Degmada kaxda ee Gobolka Banaadir Maxamed Ismaaciil oo u mahadceliyay maamulka iyo shaqaalaha Idaacadda Risaala, wuxuuna sheegay kalsoonida Deeqdan lagu soo aruuriyay iyo mida lagu qeybiyay in ay muujineyso in shacabka Soomaaliyeed ay is gar gaari karaan.
Barnaamijka Afuri oo hel laba Ajir ayaa maalin kasta ka baxa Idaacadda Risaala 04:00 ilaa 05:00 galabnimo, waxaana dhageystayaasha Risaala ee ku sugan dal iyo dibadba ay ka qeyb qaadanayaan u gurmashada dadka dhibaateysan.
