Sawirada lasoo bandhigay ayaa muujinaayo muuqaalka dooni aan ku qiyaasay iney ka weyn tahay doonyaha kaluumeysiga caadiha ah ayna gaarsiisneen markab weyn taasi oo laga dajinayo hubka.
Noocyada hubka oo kala duwan marka laga yimaado, hubka ayaa ahaa mid cusub dhamaantii, waxaana laga dajiyay doonida oo sida la sheegay kusoo wajahneyd xeebaha dalka Soomaaliya.
Ma jirto faahfaahin dhaafsiiyay in doonida ay kusoo wajahneyd xeebaha dalka Soomaaliya, waxaana soo baxay su’aalo badan oo ku saabsan hubkaasi oo gacanta ay ku dhigeen ciidamada badda Australia.
Goobta doonida lagu qabtay wey ka fog tahay xeebaha Soomaaliya, oo waa xeebaha dalka Cuman, waxaase la isweydiinayaa yaa loo waday hubka, halkee laga keenay & su’aalo kale oo hubkaasi la xiriira.
Admiral David Johston oo kamid ah saraakiisha ciidanka badda Australia ayaa sheegay in feejignaan ciidamooda ay ku jireen suurto gal ka dhigtay in doonidaasi gacanta lagu dhigo.
Shabaq weyn oo kaluunka lagu dabo ayaa hubka lagu qariyay, waxaana uu ka koobnaa 1989 qori oo Ak-47 ah, 100 gantaalada gacanta laga gano ah, 49 PKM oo Russian ah,iyo ku dhawaad 60 hoobiye ah.
Waxaa haatan socdo baaritaano lagu sameynayo wadanka laga keenay hubkaasi iyo cidda loo waday, laakiin waxaa ilaa iyo hadda la xaqiijiyay in hubkaasi uu kusoo wajahnaa xeebaha dalka Soomaaliya, wallow aan si rasmi ah loo cayimin halka loo waday.
