Jubba-RisaalaFM- Golaha Ammaanka QM oo shalay Khamiistii aheyd kulan yeeshay ayaa waxa ay ka digeen xadgudubyada baahsan ee loo geysto caruurta ku nool dalalkan oo kala ah Afgaanistaan, Jamhuuriyadda Dimuqraadiga ah ee Congo, Ciraaq, Soomaaliya, Koonfurta Suudaan, Suuriya iyo Yemen.
Warbixin ay soo saareen Golaha Ammaanka ayay ku sheegeen in ka badan 15,500 oo carruur ah in ay noqdeen dhibanayaal la kulma xadgudubyo baahsan oo ay ku jiraan heerarka naxdinta leh ee dilka iyo dhaawaca.
Sidoo kale Golaha ayaa sheegay caruurta in laga qeyb geliyo iska hor imaadyada hubeysan, oo lagu soo bandhigo heerka aan la aqbali karin ee u dhaxeeya Ciidamada Dowladda iyo kooxaha hubaysan ee aan dawliga ahayn.
“Ujeedada warbixintan ma ahan oo kaliya in kor loo qaado wacyiga ku saabsan xadgudubyada xuquuqda carruurta, laakiin sidoo kale waa in lagu dhiirrigeliyo tallaabooyinka hoos u dhigi kara dhibaatada naxdinta leh ee carruurta colaadaha ah.” Waxaa sidaas yiri Wakiilka Gaarka ah ee Xoghayaha Guud Virginia Gamba.
Xoghayaha Guud ee Qaramada Midoobay António Guterres ayaa ku celiyay baaqiisa ku saabsan dhinacyada isku haya dagaalka si ay ugu hoggaansamaan mas’uuliyadda ilaalinta carruurta, iyada oo waafaqsan waajibaadka saaran sharciga caalamiga ah ee bini’aadanimada iyo xuquuqda aadanaha.
Warbixinta ayaa sidoo kale qeexday in qaybaha cusub iyo walwalka cusub ee ku jira warbixinta ay ka tarjumayaan isdhexgalka UN-ka ee kor u qaadaya, taas oo horseedi karta dhimista carruurta dhibanayaasha hubeysan.
Ugu dambeyntii Golaha Ammaanka ayaa sheegay xadgudubyada loo geysto caruurta in ay ka mid yihiin dilka, dhaawaca, dharbaaxada, kufsiga, afduubidda carruurta xaaladaha dagaallada iyo kuwo kale.