Daafaca dambeedka bidix ee reer Brazil Marcelo ayaa dib ugu soo laabtay tababarka kooxdiisa Real Madrid.
Marcelo ayaa haatan diyaar u noqonaya inuu ciyaaro kulanka ay Los Blancos wajaheyso Paris Saint-Germain ee lugta labaad ee wareegga 16ka tartanka UEFA Champions League.
Xitaa waxaa macquul ah inuu daafaca reer Brazil diyaar u noqdo kulanka ay Real Madrid wajaheyso kooxda Getafe, tababare Zinedine Zidane ayaana diyaar u ah inuu xulashadiisa ku darsado maadaama uu u baahan yahay inuu daqiiqado ciyaaro ka hor kulanka ay Faransiiska ugu martinayaan PSG.
Marcelo ayaa 18kii bishii Febraayo ku dhaawacmay kulankii ay Real Madrid wajahday kooxda Real Betis.
Dhanka kale, Vallejo ayaa kusoo laabtay tababarka kooxda Real Madrid maanta oo Khamiis ah ka dib muddo bil ah oo uu garoomada ka maqnaa.
Si kastaba ha ahaatee, tababare Zinedine Zidane waxaa weli ka maqan xiddigaha qadka dhexe Toni Kroos iyo Luka Modric kuwaasoo ku jira liiska ciyaartoyda dhaawacan, laakiin ugu yaraan mid ka mid ah ayaa taam u noqon doona kulanka PSG.