Gedo-RisaalaFM- Ciidamo ka tirsan kuwa Kenya ee qeybta ka ah howlgalka AMISOM iyo Al-shabaab ayaa Dagaal waqti kooban qaatay waxa uu ku dhexmaray duleedka degmada Baardheere ee gobolka Gedo.
Dagaalkan ayaa si gaar ah waxa uu uga dhacay degaanada Faxfax-dhuun iyo Tarako oo ku yaalla duleedka degmada Baardheere, sida uu soo sheegayo wariyaha Risaala ee gobolkaasi.
Dagaalkan ayaa yimid kadib markii Al-shabaab ay weerar saf balaaran ah wadada ugu galeen Ciidamo ka tirsan kuwa Kenya, kuwaasi oo sahay u galbinayay Ciidamo kale oo Kenyan ah.
Qaar ka tirsan dadka degaanka ayaa Idaacadda Risaala waxa ay u sheegeen in Dagaalkan Ciidamada ay isku adeegsadeen hubka nuucyadiisa kala duwan, uuna jiro khasaare labada dhinac soo kala gaaray.
Shabaabka dhankooda oo weerarkan kaga hadlay baraha ay ku faafiyaan wararkooda waxa ay ku sheegeen in weerarkan Ciidanka Kenya ay kaga gubeen mid ka mid ah Gawaarida Gaashaaman oo Ciidamada Kenya ay wateen.