Duqeyn diyaaradeed oo ka dhacday Gobolka Jubbada Dhexe

Wararka ka imaanaya gobolka Jubbada Dhexe ayaa sheegaya in duqayn ay ka dhacday meel u dhow magaalada Saakow ee gobolkaasi.

Duqayntan ayaa dhacday maanta, waxaana wararka laga helay ilo ku dhow dowladda Soomaaliya ay sheegayaan in lala bartilmaameedsaday xubin ka tirsan ururka Al-Shabaab.

Saraakiil ka tirsan Hay’adaha dowladda ayaa waxaa ay sheegeen in duqeyntaas lagu dilay xubin ka tirsan Al-Shabaab ee lala beegsaday.

Warsaxaafadeed uu soo saaray taliska ciidanka Mareykanka ee Africa ee loo soo gaabiyo AFRICOM ayay ku sheegeen in duqeyntan ay iska kaashadeen ciidamada Mareykanka iyo kuwa dowladda Soomaaliya.

“Waxaan sii wadi doonaan iskaashiga aan la leennahay saaxiibadeenna Soomaaliya si aan u baabi’inno kooxaha argagixisada ah ee doonaya iney waxyeeleeyaan shacabka Soomaaliyeed,” ayuu yiri Brig. Gen. Miguel A. Castellanos oo ah ku-xigeenka agaasinta howlgallada ee Taliska AFRICOM.

Maraykanka ayaa inta badan qaada duqaymaha ka dhanka ah ururka Al-Shabaab iyagoo iskaashi kala sameeya dowladda Soomaaliya.

Sannadkan keliya ayaa Maraykanku sheegeen inay Soomaaliya ka geysteen 59 duqeymood.