Shirkii ugu horeeyay oo ay yeeshaan dhamaan howladeenada Safaaradda Soomaaliya ee dalka Uganda oo uu shir gudoominayay siihayaha cusub ee Safaaradda Mudane Cali Maxamed Maxamuud (Ali Cagabaruur) ayaa maanta ka dhacay xarunta safaaradda, kulankaas oo looga hadlay arrimo badan oo isbadalka safaaradda ka mid ah.
Shirka oo joogta noqon doona bishiiba hal mar ayaa waxaa uu ujeedkiisa ahaa isbarasho iyo shaqo qeebin sida shaqada u kala leeyihiin shaqaalaha safaradda, iyadoo sidoo kalena xooga lagu saaray sidii loo dardar galin lahaa howlaha ay safaaradda hayso.
Cali Maxamed Maxamuud (Cali Cagabaruur ) ayaa faray dhamaan shaqaalaha safaaradda in muwaadiniinta Soomaaliyeed loo dhimriyo loolana dhaqmo si wanaagsan oo xushmad leh, iyadoo adeeg walba safaaradda uga baahdaana loo fududeen doono.
Siihayaha ayaa sheegay in maadaama Safaaradda leedahay qeyb warfaafineed ay ka shaqeyn doonto sidii laysugu soo dhaweyn lahaa xariirka labada dal ee dhanka warfaafineed iyo baahinta sooyaalka labada dal, sidoo kalena saxaafadda Uganda loosoo bandhigi doono abaalkii dowladdii Soomaaliya u gashay todobaatameeyadii oo kaalin libaax ka qaadatay dowladdii Soomaaliya hishiis xiligaas dhacay, iyadoo dhanka kalena lasoo bandhigi doono abaalkii lama ilaabaanka ahaa ee dowladda Uganda u galeen dalka Soomaaliya.
Cali Cagabaruur ayaa sheegay mar uu ka hadlayay qeybta Waxbarashada in safaaradda qeyb ka qaadan doonto sidii ardayda Soomaaliyeed ee Uganda wax ka barta loogala talin lahaa jaamacadaha ugu wanaagsan ee dalka si ardayda ugu lug go’in jaamacado aan tayo lahayn iyo kuwa aan aqoonsi caalimi ah haysan, iyadoo safaaradda soo bandhigi doonto liiska jaamacaha ugu wanaagsan kadib marka ay baaritaan kusoo samayso dhamaan jaamacadaha
Siihayaha oo sidoo kale ka hadlay xariir ganacsi ayaa sheegay in ay socoto tirakoob lagu sameynayo ganacsatada Soomaaliyeed ee magaca Soomaaliya ku diiwaan gashan si kor loogu qaado xariirka ganacsi ee Soomaaliya iyo Uganda ka dhaxeeya.
Cali Maxamed Maxamuud Siihayaha Safaaradda ayaa sheegay in dadaal safaaradda ugu jirto sidii dal ku galka Soomaaliya dhawaan safaaradda u bixin lahayd, iyadoo kaashanaysa hay’adda socdaalka iyo Jinsiyadda, sidoo kalena safaaradda ka shaqeyn doonto sidii muwaadiniinta Soomaaliyeed loogu fududeen lahaa DAL KU GALKA dalkan Uganda.
Ugu dambeyntii Siihaye Cali Cagabaruur ayaa faray dhamaan shaqaalaha in muwaadiniinta aad loogu turo oo la dhagaysto cabashooyinka ay qabaan.