London-RisaalaFM- Madaxweynaha Jamhuuriyadda Federaalka Soomaaliya Maxamed C/laahi Maxamed (Farmaajo) ayaa maanta Magaalada London ee dalka Ingiriiska uga qeyb galay shir horudhac u ah midka berri ka furmaya Magaaladaasi.
Shirkan ayaa waxaa ka qeyb galay Madaxweyne Farmaajo, Ra’iisul Wasaare ku xigeenka dalka Abuukaate Mahdi Guuleed, Wakiilka gaarka ah Qarmada Midoobay ee arrimaha Soomaaliya Micheal Keating, Qurbajoogta Soomaaliyeed, Ururada bulshada Rayidka iyo xubno kale.
Shirkan ayaa waxa uu ujeedkiisa ahaa sida ugu Macquulsan ee Qurbajoogta ay uga qeyb qaadan karaan Hormarinta Dhaqaale ee Soomaaliya.
Maxamed C/laahi Maxamed (Farmaajo) Madaxweynaha Jamhuuriyadda Federaalka Soomaaliya oo kulanka ka hadlay ayaa sheegay in la dhisi doono Hay’adda Qurbajoogta Soomaaliyeed.
Sidoo kale waxa uu sheegay Maxamed Farmaajo muhiim in ay tahay in Qurbajoogta Soomaalida ay maalgashi ku sameystaan dalka si dhaqaalaha Soomaaliya uu sare ugu kaco.
Malinta berri ah oo Taariikhda ay ku beegan tahay 11-ka May ayaa waxaa Magaalada London ee dalka Ingiriiska ka furmaya shir looga hadlayo arrimaha Soomaaliya, waxaana ka qeyb galaya wafdi uu hoggaaminayo Madaxweynaha Soomaaliya, oo ay ka mid yihiin Madaxda Maamul Goboleedyada.