Ciidamo la sheegay inay ka tirsanaayeen Hay’adda Nabadsugida iyo Sirdoonka Soomaaliya ayaa Caawa waxaa ay Gudaha Xaruntooda jirdil ugu geysteen Wariyeyaal ka tirsan TV-ga ku hadla Afka Soomaaliga ee Somali Cable ee Magaalada Muqdisho.
Barta Facebook ee TV-ga ayaa waxaa lagu daabacay in dhacdadaani ay timid kadib markii ilaalada Telefishinka ay ka shakiyeen dhalinyaro fadhiday ilinka hore ee Xarunta TV-ga taas oo keentay inay isku dhacaan ilaalada iyo Dhalinyarada.
Sidoo kale waxaa lagu sheegay in Ciidamo ka tirsan NISA oo ka tegay Godka Jilacow ay Gudaha Xarunta TV-ga galeen,isla markaana ay jirdil u geysteen Wariye iyo muuqaal duubo ka tirsan Telefishinka.
Xaalada Xarunta TV-ga oo rasaas laga maqlay haatan waa ay degan tahay,waxaana arrintaan ay kusoo aadeysaa xilli Maanta Ururada Saxaafadda Soomaaliya ay sheegeen in caburin iyo cagajugleyn lagu haayo Warbaahinta.
