Allaha u Naxariistee waxaa Caawa Magaalada Muqdisho lagu dilay Wariye Saciid Yuusuf Cali oo kamid ahaa Wariyeyaasha ka howlgalla Magaalada Muqdisho ee Caasimadda Soomaaliya.
Sida ay sheegeen ehelada iyo asxaabta, nin mindi ku hubeysnaa ayaa weeraray saxafiga tiro afar jeer banaanka dukaan ku yaala xaafada Sey Biyano ee degmada Hodon ee Muqdisho qiyaastii 7.30p.m. kadib dhaawac culus uu u geystay ayuu ku geeriyooday mid kamid ah Isbitaallada ku yaalla Magaalada Muqdisho.
Mowliid Maxamed Urur oo ah agaasimaha TV-ga Kalsan oo uu ka Shaqeynayay ayaa yiri: “Wuxuu ka sheekeeyey dilkii loo geystey macalin iskuul ku yaal Afgooye isniintii ka hor inta uusan TV-ga u aadin gurigiisa 2-dii Duhurnimo.” .
Booliska ayaa waxaa ay Warbaahinta u sheegeen in la haayo qofkii ka dambeeyey dilka Wariye Saciid Yuusuf Cali,isla markaana lagu xiray Xarunta Hay’adda dambi baarista ee CID-da.
Allaha u naxariistee Marxuum Saciid Yuusuf Cali, oo da’diisu ahayd 30 sano jir, wuxuu ifka ka tegay laba wiil iyo Xaas,waxaa uu kasoo Shaqeeyay Idaacado dhowr ah oo ku yaala Muqdisho oo ay kamid tahay Idaacadda Risaala iyo TV-yo.
“Anaga, Ururka Suxufiyiinta Soomaaliyeed (SJS), Xiriirka Suxufiyiinta Soomaaliyeed (FESOJ), Ururka Saxaafadda Soomaaliyeed (SOMA) iyo Ururka Madaxa-bannaan ee Warbaahinta Madaxa-bannaan ee Soomaaliya (SIMHA), waxaan dhalleecaynaynaa dilkii saxafigii aannu wada shaqeyn jirnay Saciid Yuusuf Cali waxaanan tacsi u direynaa qoyskiisa, asxaabtiisa iyo dhammaan suxufiyiinta Soomaaliyeed.
Dilkan ayaa noqonaya kii ugu dambeeyay weeraro isdaba joog ah oo lagula kaco suxufiyiinta iyo xirfadleyda warbaahinta ee Soomaaliya. Dilku wuxuu ka soo horjeedaa hanjabaadyo isa soo taraya, cabsi gelin iyo kadeedis ay wado xukuumadda Soomaaliya. Waa wax aad looga walwalo in ku dhowaad dhammaan weerarrada lagu qaado suxufiyiinta Soomaaliyeed ay yihiin kuwo aan loo ciqaabin ayaa lagu yiri War-Saxaafadeedka.
Waxaan ugu baaqeynaa dowladda Soomaaliya inay qaaddo tilaabo deg deg ah oo ay kujirto baaritaanka dambiilayaasha si loo xaqiijiyo ujeedada loo dilay saaxiibkeena.
Maalintii xorriyadda saxaafadda ee maalintii Axadda aheyd, annaga oo ah bahda saxaafadda Soomaaliyeed waxaan ugu baaqnay mas’uuliyiinta inay soo afjaraan rabshadaha iyo hanjabaadaha loo geysto suxufiyiinta iyadoo loo marayo qareenkeenna, waxaan u gudbinay warqad caddeyn rasmi ah oo muujineysa xadgudubyo muhiim ah oo ka dhan ah xorriyadda saxaafadda xafiisyada Madaxweynaha Soomaaliya. , Maxamed C / llaahi Maxamed (Farmaajo), Ra’iisul Wasaare, Xasan Cali Khayre iyo Wasiirka Warfaafinta, Maxamed Cabdi Xayir (Maareeye)