Muqdisho-RisaalaFM- Madaxweynaha Soomaaliya Xasan Sheekh Maxamuud ayaa si kulul u cambaareeyay weerarkii lagu qaaday dalka Sacuudi Carabiya.
War saxaafadeed ka soo baxay xafiiska Madaxweynaha Soomaaliya ayaa lagu sheegay in dowladda Soomaaliya ay si aada ugu xuntahay weerarkii lagu qaaday dalka Sacuudi Carabiya.
” Anigoo ku hadlaya magaca Jamhuuriyadda Federaalka ah ee Soomaaliya iyo kan dadka Soomaaliyeed , waxaan si qoto dheer uga naxay ugana murugooday weerarkii argagixisinimo ee lagu qaaday dhulka barakaysan waxaan Murugada la qeybsanaynaa walaalaheena reer Sacuudi Carabiya “, ayuu yiri Madaxweyne Xasan Sheekh Maxamuud .
Madaxweynaha ayaa carabka ku adkeeyay in dunida Carabta , dalalka Muslimiinta ah iyo dunida inteeda kale ay muhiim tahay in ay u midoobaan xilligan xasaasiga ah oo kale si loo xakameeyo weerarada argagixisada.
Madaxweynaha Soomaaliya ayaa sheegay in dalalka islaamka bisha barakaysan ee Ramadaan ay ka dhaceen weeraro badan oo ay geysteen argagixisada tasoo uu sheegay madaxweyne Xasan in dad badan oo muslimiin ah ay dhibaato ka soo gaartay.
Ugu yaraan 4 Ruux oo ka mid ahaa Saraakiisha amaanka ayaa dhintay, 5 kalena dhaawac ayaa ka soo gaaray Weerar ismiidaamin ahaa oo ka dhacay banaanka Masjidka Nabi Muxamed عليه السلام oo ku yaalla Magaalada Madina ee Dalka Sacuudiga.