Lix qof oo hubaysan ayaa la wareegay gacan-ku-haynta markab shidaal qaada oo marayay Gacanka Cadmeed, meel ka baxsan xeebaha Yemen, waxaana markabka loo weeciyay dhanka Soomaaliya, sida ay sheegtay Hay’adda Hawlgallada Ganacsiga Badda ee Boqortooyada Midowday (UKMTO).
Hay’adda ayaa sheegtay inay heshay xaqiijin ah in lix qof oo hubaysan ay fuuleen markabka, isla markaana ay hadda gacanta ku hayaan, iyagoo u weecinaya dhanka Soomaaliya.
Mas’uuliyiinta ayaa bilaabay baaritaan ku saabsan dhacdadan, waxaana maraakiibta ganacsiga ee ku sugan aagga Gacanka Cadmeed loogu baaqay inay muujiyaan feejignaan dheeraad ah, isla markaana soo sheegaan wax kasta oo dhaqdhaqaaq shaki leh.
UKMTO ayaa markii hore sheegtay in markab shidaal qaada uu diray fariin degdeg ah oo loo adeegsado raadiyaha VHF Channel 16, isagoo sheegay inuu la kulmay markab aan loo fasixin inuu u soo dhowaado, xilli uu dhanka galbeed uga safrayay Gacanka Cadmeed.
Ilaa iyo hadda lama shaacin magaca markabka, halka saxda ah ee uu ku sugan yahay ama cidda ka dambeysa dhacdadan. Sidoo kale, ma jirto koox si rasmi ah u sheegatay mas’uuliyadda la wareegista markabka.
Dhacdadan ayaa kusoo beegmaysa xilli xaaladda amni ee marinnada muhiimka ah ee maraakiibta ganacsiga ee Badda Cas iyo Gacanka Cadmeed ay sii xumaanayso, iyadoo ay jiraan walaacyo la xiriira weerarro iyo afduubyo loo geysto maraakiibta.
Xeebaha Soomaaliya ayaa horey muddo dheer loogu yaqaanay dhacdooyin burcad-badeednimo, gaar ahaan intii u dhexeysay 2008 iyo 2018, inkastoo weerarradaasi ay si weyn hoos ugu dhaceen.
Si kastaba, dhacdooyin la xiriira burcad-badeednimo ayaa mar kale soo kordhay dhammaadkii 2023, iyadoo gobolka uu wajahayo xiisado amni oo is biirsaday.
Ilaa hadda, Hay’adda Hawlgallada Ganacsiga Badda ee Boqortooyada Midowday (UKMTO) waxay sheegtay in baaritaanka dhacdadu uu socdo, iyadoo aan weli la xaqiijin cidda ka dambeysa afduubka ama halka ugu dambeysa ee markabka loo weeciyay.