Wasaaradda Gaashaandhigga Dowladda Mareykanka ayaa sheegtay in ay doonayso in ay sare u qaado dagaalada iyo sidoo kale Weerarada lagu qaadaayo dagaalyahanada Xarakada Al-Shabaab ee howlgala Soomaaliya.
Sarkaal ka tirsan Waaxda Difaaca dowladda Mareykanka ayaa sheegay in ay qorshaynayaan in ay kordhiyaan dagaalka lagula jiro Al-Shabaab , waxaana uu sheegay in taasi ay timid ka dib markii ilaha Sirdoonka dowladda Mareykanka ay soo gudbiyeen Khataro badan oo kusoo wajahan Mareykanka oo ay maleegayaan Al-Shabaab.
Taliska Ciidanka dowladda Mareykanka ee Qaarada Afrika ayaa u baahan in uu ogolaansho ka helo Madaxweynaha dowladda Mareykanka si ay u kordhiyaan dagaalka lagula jiro dagaalyahanada Al-Shabaab.
Waxaana ay sheegeen in Madaxweynaha dowladda Mareykanka laga doonaayo in bixiyo ogolaansho ku aadan kordhinta weerarada lagu qaadayo Al-Shabaab.
Thomas Waldhauser, oo ah Madaxa Ciidanka Mareykanka ee Afrika ayaa sheegay in Soomaaliya ay ka mid ah tahay meelaha u baahan in la kordhiyo Weerarada lagu qaadayo Argagixisada.
“ Soomaaliya waa mid ka mid ah dalalka Qaarada Afrika , waxaana dalka ugu adag ee aan ka fulino Weerarada aan ku beegsaneyno Argagixisada” ayuu yiri Thomas Waldhauser.
Dowladda Mareykanka ayaa ka mid ah dowladaha dagaalka kula jira Al-Shabaab , waxaana inta badan ay beegsataan goobaha Fariisinka u ah Xarakada Al-Shabaab.