Madaxweynaha Soomaaliya, Xasan Sheekh Maxamuud, ayaa xilka ka qaaday Guddoomiyihii Maxkamadda Sare ee dalka, Baashe Yuusuf Axmed, isaga oo xilkaas dib ugu magacaabay Garyaqaan Ibraahim Iidle Suleymaan oo horay u soo noqday guddoomiyaha Maxkamadda Sare.
Go’aanka madaxweynaha ayaa yimid kaddib cabashooyin la xiriira hufnaanta iyo habsami u socodka garsoorka oo ay muujiyeen garsoorayaal, hawl-wadeennada hay’adaha garsoorka iyo xirfadlayaasha sharciga, sida lagu sheegay war-saxaafadeed ka soo baxay Madaxtooyada Soomaaliya.
Madaxtooyada ayaa sheegtay in magacaabistan ay qayb ka tahay qorshe dib-u-habeyn loogu sameynayo hay’adaha garsoorka, kaas oo lagu doonayo in lagu xoojiyo hufnaanta, madax-bannaanida garsoorka iyo kalsoonida shacabka ee nidaamka caddaaladda dalka.
Ibraahim Iidle Suleymaan ayaa markii ugu horreysay xilka Guddoomiyaha Maxkamadda Sare loo magacaabay bishii Luulyo 2011, wuxuuna xilka hayay ilaa May 2016. Waxa uu sidoo kale soo noqday la-taliyaha dhinaca sharciga ee Madaxweynaha Soomaaliya.
Madaxweyne Xasan Sheekh ayaa guddoomiyaha cusub kula dardaarmay inuu ilaaliyo madax-bannaanida garsoorka, ku dhaqanka sharciga iyo xaqiijinta caddaalad loo siman yahay.