Ra’iisul Wasaaraha ahna Wasiirka Arrimaha Dibadda Qatar, Sheekh Maxamed bin Cabdiraxmaan Al Thani, ayaa sheegay in dadaallada diblomaasiyadeed ee lagu xakameynayo xiisadda gobolka ay weli socdaan, isaga oo ka digay in xaaladda aan la iska indho tiri karin iyadoo aan xal laga gaarin.
Sheekh Maxamed oo Jimcihii ka hadlay munaasabad ka dhacday Jaamacadda Oxford ee dalka Britain, ayaa sheegay in toddobaadyadii la soo dhaafay ay wada shaqeyn dhow la lahaayeen mas’uuliyiin ka tirsan maamulka Mareykanka, kuwaas oo uu sheegay inay si dhab ah uga go’an tahay sidii loo heli lahaa waddo lagu dejiyo xiisadda, lagana hortago dagaal ballaaran oo gobolka ka qarxa.
Wuxuu sidoo kale sheegay in dadaallada dhexdhexaadinta ay sii socdaan si looga hortago in xaaladdu faraha ka baxdo, isaga oo xusay in codad caqli ku dhisan oo ka yimid gudaha Tehran ay gacan ka geysteen in xiisadda aanay heer khatar ah gaarin.
Ra’iisul Wasaaraha Qatar ayaa intaas ku daray in isbeddellada ka dhashay doorashadii Mareykanka laga yaabo inay mustaqbalka saameyn ku yeeshaan siyaasadaha Washington, balse aysan meesha ka saareyn rabitaanka maamulka Mareykanka ee ku aaddan in xal diblomaasiyadeed la helo.
Wuxuu carrabka ku adkeeyay in aan la sugin heshiis nabadeed oo dhammaystiran, balse ay muhiim tahay in laga faa’iideysto fursadaha jira si loo gaaro heshiis wanaagsan oo xiisadda lagu dejin karo.
Ugu dambeyn, Sheekh Maxamed ayaa xaqiijiyay in xiriirrada iyo dadaallada diblomaasiyadeed aysan istaagin, inkastoo ay maalmahan ka yara firfircooni hooseeyaan sidii ay ahaayeen dhowr maalmood ka hor.
Wuxuu sheegay in Qatar ay sii wadi doonto dadaalladeeda dhexdhexaadinta si looga hortago in xiisadda gobolka isu beddesho dagaal ballaaran.