Maamulka Jubbaland ayaa Dowladda Federaalka Soomaaliya ku eedeeyay inay cadaadis siyaasadeed u weecisay Puntland, kaddib markii ay sida uu sheegay ku guuldareysatay dadaallo ay hore ugu wajahday Jubbaland.
Wasiirka Warfaafinta, Dhaqanka iyo Dalxiiska Jubbaland, Cabdifataax Maxamed Mukhtaar, ayaa qoraal uu soo saaray ku sheegay in Dowladda Federaalka aysan ku guuleysan qorshayaal ay ku dooneysay inay saameyn ku yeelato Jubbaland, isagoo xusay in shacabka iyo maamulka Jubbaland ay iska caabiyeen waxa uu ku tilmaamay faragelin siyaasadeed.
Wasiirka ayaa sidoo kale sheegay in dowladda hadda ay diiradda saartay Puntland, hase yeeshee uu rumeysan yahay in shacabka iyo maamulka Puntland ay si adag uga hortagi doonaan tallaabo kasta oo ay u arkaan mid wax u dhimaysa nabaddooda, xasilloonidooda iyo nidaamkooda dowladeed.
“Shacabka iyo Dowladda Puntland waxay si adag uga hortagi doonaan isku day kasta oo lagu waxyeelleynayo nabaddooda, xasilloonidooda iyo dowladnimadooda,” ayuu yiri Cabdifataax Maxamed Mukhtaar.
Cabdifataax Mukhtaar ayaa farriin u diray Madaxweynaha Soomaaliya, Xasan Sheekh Maxamuud, isagoo sheegay in siyaasadda aysan ku dhisneyn awood iyo cadaadis oo keliya, balse ay u baahan tahay wada-hadal, xisaabtan iyo aragti fog.
Wuxuu ka digay in go’aanno hal dhinac ah ay yeelan karaan cawaaqib siyaasadeed oo mustaqbalka saameyn ku yeesha dalka.
Ilaa iyo hadda, Dowladda Federaalka Soomaaliya kama aysan jawaabin eedeymaha iyo hadallada kasoo baxay maamulka Jubbaland.
Hadalladan ayaa kusoo aadaya xilli uu weli taagan yahay khilaafka siyaasadeed ee u dhexeeya Dowladda Federaalka Soomaaliya iyo qaar ka mid ah dowlad-goboleedyada, kaas oo salka ku haya arrimo la xiriira nidaamka federaalka, dib-u-eegista dastuurka iyo awood-qeybsiga dalka.